Nərimanov rayon məktəbliləri “Ölkəmizi tanıyaq” tur-aksiyası çərçivəsində Naxçıvan Muxtar Respublikasına yola salınıblar

Nərimanov rayon məktəbliləri “Ölkəmizi tanıyaq” tur-aksiyası çərçivəsində Naxçıvan Muxtar Respublikasına yola salınıblar

26 mart 2018-ci il tarixdə Nərimanov rayonunun orta ümumtəhsil məktəblərinin 9-11-ci siniflərində təhsil alan 30-a yaxın şagird “Ölkəmizi tanıyaq” maarifləndirici tur-aksiyası çərçivəsində Naxçıvan Muxtar Respublikasına yola salınıblar.
Yolasalma mərasimində Nərimanov Rayon İcra Hakimiyyəti başçısının müavinləri İradə Mahmudova və İlqar Mirzəyev, Nərimanov Rayon Gənclər və İdman İdarəsinin rəisi Nəcəf Novruzov, müəllimlər, valideynlər, məktəblilər və bir qrup fəal gənc iştirak ediblər.
Yolasalma mərasimində çıxış edən Nərimanov Rayon İcra Hakimiyyəti başçısının müavini İradə Mahmudova bu tur-aksiyanın məktəblilərin dünyagörüşünün zənginləşməsində önəmini vurğulayıb. Bildirib ki, “Ölkəmizi tanıyaq” tur-aksiyası bir neçə ildir uğurla həyata keçirilir. Bu, dövlətimizin məktəblilərə göstərdiyi diqqət və qayğının təzahürüdür. Səfər çərçivəsində məktəblilər Naxçıvanın tarixi, mədəniyyəti, təbiəti, adət-ənənələri, qədim abidələri ilə tanış olacaq, geniş məlumat əldə edəcəklər.
Nərimanov Rayon İcra Hakimiyyəti başçısının müavini İlqar Mirzəyev və Rayon Gənclər və İdman İdarəsinin rəisi Nəcəf Novruzov “Ölkəmizi tanıyaq” devizi altında keçirilən tur-aksiyanın məktəblilərin hərtərəfli inkişafında önəmindən bəhs ediblər. Məktəblilərə layihə çərçivəsində keçiriləcək yarışlarda, viktorinalarda fəal olmaq tövsiyə edilib.
Sonra məktəblilər Heydər Əliyev Beynəlxalq Hava Limanına yola düşüblər.