Nərimanov Rayon İcra Hakimiyyəti başçısının rayon sakinləri ilə növbəti səyyar görüşü keçirilmişdir.

Nərimanov rayonu, İ.Həsənoğlu küçəsi 2 ünvanında Nərimanov Rayon İcra Hakimiyyətinin başçısı Abdin Fərzəliyevin həmin ünvanda və ətraf ərazidə yaşayan rayon sakinləri ilə növbəti səyyar görüşü keçirilmişdir.
Azərbaycan Respublikası Prezidenti Administrasiyasının məsul işçisi Tağı Tağıyevin, rayonun hüquq mühafizə, səhiyyə, təhsil, mədəniyyət, digər xidmət sahələri rəhbərlərinin, ərazi icra nümayəndələrinin, həmçinin 150 nəfərə qədər sakinin iştirak etdiyi qəbulda Nərimanov Rayon İcra Hakimiyyətinin başçısı Abdin Fərzəliyev rayon sakinlərini salamlayaraq,  Azərbaycan Respublikasının Prezidenti cənab İlham Əliyevin rəhbərliyi altında ölkə həyatının bütün sahələrində olduğu kimi, sosial-iqtisadi sahədə də yüksək nailiyyətlərin əldə edildiyini bildirmiş, eyni zamanda, Respublikamızda aparılan uğurlu sosial-iqtisadi siyasət nəticəsində Bakı şəhərinin aparıcı rayonlarından olan Nərimanov rayonunun da hərtərəfli inkişafı üçün böyük işlər görüldüyünü və bu işlərin hazırda da uğurla davam etdirildiyini vurğulamışdır.
Sakinlərin onları narahat edən bu və ya digər məsələlərlə bağlı verdikləri sualları ətraflı cavablandıran A.Fərzəliyev əhalinin problemlərinin həlli, sosial rifahının yaxşılaşdırılması istiqamətində həyata keçirilən tədbirləri xüsusi vurğulayaraq, həmçinin geniş müzakirələr aparmışdır.
Səyyar qəbulda çıxış edən sakinlər təbii qaz, elektrik enerjisi və su təchizatı, sosial müdafiə, təhsil, mədəniyyət, səhiyyə, məşğulluq və s. məsələlərlə əlaqədar rəy və təkliflərini vermiş, rayon ərazisində gedən genişmiqyaslı işlərə görə öz təşəkkürlərini bildirmişlər.
Qeyd olunmuşdur ki, yerlərdə keçirilən bu cür görüşlər əhalinin qayğı və problemlərinin yerindəcə öyrənilməsi və operativ həllinə imkan verir.
Sonda rayon icra hakimiyyətinin başçısı A.Fərzəliyev sakinlər tərəfindən qaldırılan məsələlərin tez bir zamanda həlli ilə əlaqədar aidiyyəti qurum rəhbərlərinə müvafiq tapşırıqlar vermişdir.
Həmin gün axşam saatlarında isə Müqəddəs Ramazan ayı olduğunu nəzərə alaraq, Rayon İcra Hakimiyyəti tərəfindən səyyar qəbulun keçirildiyi ərazidə yerləşən əhalinin mədəni-kütləvi tədbirlər otağında sakinlər üçün geniş iftar süfrəsi açılmışdır.