Nərimanov rayonunda Azərbaycanın milli təhlükəsizlik orqanlarının yaradılmasının 100 illik yubileyi qeyd olunmuşdur.

Nərimanov rayonunda Azərbaycanın Dövlət Təhlükəsizlik Xidmətinin yaradılmasının 100 illik yubileyi qeyd olunmuşdur.

27 mart 2019-cu il tarixdə Nərimanov Rayon İcra Hakimiyyətinin iclas zalında Azərbaycanın milli təhlükəsizlik orqanlarının yaradılmasının 100-cü ildönümü münasibətilə tədbir təşkil olunmuşdur.
Tədbirin əvvəlində Dövlət Təhlükəsizlik Xidmətinin inkişaf tarixindən, onların effektiv fəaliyyətindən, ölkəmizə qarşı daxili və xarici təhdidlərin qarşısının alınması istiqamətində həyata keçirdiyi qabaqlayıcı tədbirlərin əks olunduğu sənədli film nümayiş olunmuşdur.
Tədbirdə Rayon İcra Hakimiyyətinin rəhbərliyi, Dövlət Təhlükəsizlik Xidmətinin Nərimanov Rayon İdarəsinin rəhbərliyi və əməkdaşları, milli təhlükəsizlik orqanlarında xidmət etmiş veteranlar, rayon ərazisində yerləşən idarə və təşkilatların nümayəndələri iştirak etmişdir.
Tədbirdə çıxış edən Nərimanov Rayon İcra Hakimiyyətinin başçısı Abdin Fərzəliyev Dövlət Təhlükəsizlik Xidməti əməkdaşlarını təbrik edərək qeyd etmişdir ki, Respublikamızın ictimai-siyasi həyatında, dövlətçiliyin qorunmasında, ölkədə sabitliyin bərqərar olmasında Azərbaycan Dövlət Təhlükəsizlik Xidmətinin rolu əvəzedilməzdir.
Ötən əsrin ortalarından başlayaraq təhlükəsizlik orqanlarında Vətənə, dövlətə və xalqa əsl sədaqət ideyalarını formalaşdıran Heydər Əliyev ənənələri bu gün də yaşadılır, möhtərəm Prezidentimiz cənab İlham Əliyev tərəfindən böyük əzm və uğurla davam etdirilir. Bu gün Azərbaycan sosial-iqtisadi, ictimai-siyasi həyatın bütün sahələrində son illər daha dinamik şəkildə inkişaf edir. Bütün bu uğurlar ölkədə bərqərar olmuş ictimai-siyasi və sosial-iqtisadi sabitlikdən irəli gəlir.
Natiq vurğulamışdır ki, Azərbaycan Respublikasının milli təhlükəsizliyinin təmin edilməsində, xarici xüsusi xidmət orqanlarının kəşfiyyat fəaliyyətinin aşkarlanması və qarşısının alınmasında, beynəlxalq terrorçuluqla və transmilli mütəşəkkil cinayətkarlıqla mübarizədə yüksək peşəkarlıq və qəhrəmanlıq nümayiş etdirən təhlükəsizlik orqanları əməkdaşlarının müstəsna xidmətləri vardır. 
Tədbirdə çıxış edən DTX veteranları polkovnik Arif Zeynalov, polkovnik İbrahim Şirinov Azərbaycanın təhlükəsizlik orqanlarının yaranma tarixindən, inkişaf mərhələlərindən və keçdiyi şərəfli yoldan ətraflı söhbət açmışlar. Ulu öndər Heydər Əliyevin diqqət və qayğısı sayəsində DTX-in fəaliyyətinin təkmilləşdirildiyi qeyd olunmuşdur. Veteranlar son dövrlər bəzi xarici dairələr tərəfindən ölkəmizə qarşı təhdidlərin artdığını, gənclərimizin müxtəlif radikal qruplaşmalar tərəfindən xarici ölkələrdə baş verən silahlı qarşıdurmalara cəlb edildiyini qeyd edərək, respublikamızın müstəqilliyi əleyhinə yönəlmiş qəsdlərin qarşısının alınmasında milli təhlükəsizlik orqanlarının daim yüksək sayıqlıq və peşəkarlıq göstərdiyini bildirmiş və onlara çətin və şərəfli işlərində yeni-yeni nailiyyətlər arzulamışlar.
Yekunda xidmətdə fərqlənmiş Dövlət Təhlükəsizlik Xidmətinin Nərimanov Rayon İdarəsinin bir sıra əməkdaşları Nərimanov Rayon İcra Hakimiyyəti tərəfindən fəxri fərman və hədiyyələrlə mükafatlandırılmışlar.